تجربة الأستاذة / سمر مع المرارة وانفجار المرارة
فى سنة ٢٠١٣ تقريباً كنت تعبت اوى وحسيت بالم غريب مكلبش معدتى وبيضرب فى ضهرى وكإن روحى بتطلع والم فى كتفى شكيت انها حصوة بالمرارة المهم جريت عملت مع نفسى كده من غير كشف ولا حاجة سونار .. الدكتور قالى ليه قولتله شاكة فى حصوات فى المرارة ..
المهم عملت سونار وبالفعل طلعت حصوات .. اخدت الريبورت وحجزت دكتور وكشفت وكتبلى علاج ولا جابلى سيرة عملية نهاااائى نهااااائى نهااااائى
اخدت العلاج اسبوع حسيت انى مش كويسة والالم بيهدأ ويرجع
أخدت نفسى وحجزت جراحة مع نفسى والله .. وقلت للدكتور انا مش مرتاحة والموضوع فيه قلق انا عايزة اشيل المرارة ... الدكتور ضحك وقالى كده خبط لزق فين الكشف والسونار طيب .. شاف كل حاجة وقالى طيب ممكن نكمل علاج ونتابع .. قولتله لا عايزة اعمل العمليه .. قالى عمرى ما شوفت واحدة جاية مستعجلة كده على عملية وضحك باستغراب ..
المهم مش عارفه ازاى وافق وحددت قولتله عايزة اعملها بسرعة ... عطالى مواعيد شغله فى مبرة العصافرة .. صممت على العملية اول ميعاد كان بعد يومين .. وروحت جهزت شنطتى وجريت على اختى قولتلها هقعد عندك وبلاش ماما وبابا يعرفوا علشان ما يتخضوش .. وبالفعل اتحجزت وعملت شوية تحاليل العملية والتجهيزات .. ولبست وجهزت للعملية ومتفقة مع الدكتور هنعملها منظار لان جرحى وحش جداً
اتفاجئ بالدكتور طالبنى وبيقولى بصى يا بنتى انا دلوقتى إتفاجئت بحاجة ماكانتش ظاهرة قبل كده .. انا مش هينفع اعمل منظار .. المرارة على وشك الانفجار زى البالونة
لازم جراحة عادية ... خدى قرارك وهتكتبى تعهد بحالتك
سكت شوية وقولتله على بركة الله ... انا جيتلك ومستعجلة وقلتلك مش مرتاحة .. انا موافقة هات الاقرار وانا نصيبى ..
دخلت وانا بقول يارب ما تحرم ولادى من وجودى ...
وسلمت امرى لله .. بعد ما فوقت كنت تعبانة تعب مبالغ فيه ربنا ما يكتبع على حد ... قالى انتى فيكى حاجة لله .. انتى كنتى رايحة لا محالة .. كنتى على وشك الانفجار هى حسبة ساعات ويمكن دقايق ... حمدت ربنا اوى على نعمته انى وهبنى حياة جديدة ... وجابولى المرارة اشوفها اتخضيت ... حاجة مرعبة .. بالونة كبيرة جدا لونها احمر مرعبة ... قالى لو كنت دخلت فيها المنظار كانت انفجرت وجالك تسمم وممكن ما اعرفش الحقك .. اشكرى ربنا انه نجاكى .. فضلت اقول الحمد لله رب العالمين ..
ومازالت مستمرة في الحمد لله رب العالمين ❤️
ربنا يرحم الفنانة إيناس النجار ويحسن اليها ويجعلها فى مرتبة الشهداء ... فالمبطون شهيد ان شاءلله 😔 أكيد تعبت ووصلت لمرحلة خطر وكابرت واستحملت ودى النتيجة 😔
أرجوكم بلاش تكابروا الالم حياتكم غالية وفى الاول والأخر
الأمر كله لله ٠
#سمر
لينك هذا البوست
https://www.facebook.com/share/p/1Lmv8FfEun/?mibextid=wwXIfr
ليست هناك تعليقات:
إرسال تعليق